Сусăр пулсан та маттур ("Наше слово" Мариинско-Посадская районная газета №92 от 03.12.2016г.)
Инвалидсем республикăра тата районта иртекен тĕрлĕ мероприятисене хутшăнни çинчен пĕрре мар илтнĕ. Аслисем кăна мар, ачасем те ку енĕпе маттур. Сăмахран, хулари технологи техникумĕн студенчĕсем те сусăр ачасем хушшинче ирттерекен тĕрлĕ ăмăртусене хутшăнаççĕ. Иртнĕ ытларикун техникумра сусăр çынсен районти фестивалĕ иртрĕ. Спорт ăмăртăвĕсенче техникум студенчĕсем тупăшрĕç. Ăмăртăва районти физкультура, спорт тата туризм секторĕн заведующийĕ Г.Филинов уçрĕ. Фестиваль программине сĕтелçи теннисĕ, шашка, дартс вăййисене кĕртнĕ. Инвалидсенчен кашни хăйшĕн тăрăшса ăмăртрĕ пулин те, вĕсен хушшинче килĕшỹлĕх, кăмăллăх пулни палăрчĕ. Юлашкинчен чи маттуррисене пĕр командăна пĕрлештерчĕç. Вĕсен хушшинче - Василий Григорьев, Эдуард Михайлов, Димитрий Михайлов, Георгий Рузавин, Игорь Кириллов. Çак ушкăн кĕçнерникун Çĕнĕ Шупашкарти виççĕмĕш номерлĕ Олимп резервĕн шкулĕнче сусăр ачасемпе ирттернĕ республикăри 18-мĕш фестивале хутшăнчĕ. Унта хăйĕн маттурлăхне кăтартса Игорь Кириллов призер пулса тăчĕ. Вăл иккĕмĕш степеньлĕ диплома тата медале тивĕçрĕ. Спортра çеç мар, пĕлỹпе ăсталăха та ку йышши ачасем ыттисен умĕнче тивĕçлипе кăтартма пултараççĕ. Иртнĕ юнкун "Повар ĕçĕ" специальнăçа алла илекен инвалид ачасем хушшинче Шупашкарта ăсталăх конкурсĕ иртрĕ. Унта пирĕн техникум чысне иккĕмĕш курсра вĕренекен Михаил Пироженко хỹтĕлерĕ. Ăмăрту вăхăтĕнче унăн хăйĕн ăсталăхне икĕ енчен кăтартма тивнĕ, десерт тата чăх какайĕнчен пĕр-пĕр блюдо хатĕрлесси. Миша теори пĕлĕвĕпе те, практика ăсталăхĕпе те палăрнă. Жюри членĕсем ун ĕçĕпе кăмăллă пулнă. Конкурсра М.Пироженко иккĕмĕш вырăн йышăннă. А.СТЕПАНОВ.